ТОВЧ ТАНИЛЦУУЛГА

АПУ Дэйри гэж ямар компани вэ?

АПУ Дэйри ХХК (APU Dairy LLC) нь Улаанбаатар хотын Хан-Уул дүүрэгт байрлах Монголын сүү, сүүн бүтээгдэхүүн үйлдвэрлэгч компани юм. Компани нь нэгэн зуун орчим жилийн түүхтэй Монголын хүнс, ундааны үйлдвэрлэгч АПУ ХК-ийн 100 хувийн хөрөнгө оруулалттай. АПУ Дэйри 2014 онд сүүний салбарын технологиор дэлхийд тэргүүлэгч Германы GEA компаниас бүрэн автоматжуулсан сүүний үйлдвэрийн тоног төхөөрөмж худалдан авч үйл ажиллагаагаа эхлүүлсэн. Европын холбооны сүү боловсруулах стандартад нийцдэг Тетра Пак, Эколин, Элопак дүүргэх шугамаар тоноглогдсон тул бүтээгдэхүүн үйлдвэрээс эцсийн, савлагдсан хэлбэрээр гардаг. Өнөөдөр компани 10 брэндийн 70 гаруй сүү, сүүн бүтээгдэхүүнийг өглөө бүр шинэхнээр нь хэрэглэгчдэд хүргэж байна. Азийн хөгжлийн банк 2024 онд АПУ Дэйри-г Монголын хоёр дахь том сүүн бүтээгдэхүүн үйлдвэрлэгч хэмээн дурдсан. Компани нь уламжлалт Монгол сүү, цагаан идээний соёлыг орчин үеийн технологитой хослуулан, хүн бүрийн хэрэгцээ, амьдралын хэв маягт нийцсэн бүтээгдэхүүнээр Монгол хүний эрүүл мэндийг хамгаалахыг зорьдог.

АПУ Дэйри сүүгээ хаанаас бэлтгэдэг вэ?

АПУ Дэйри 1800 гаруй малчин, фермерээс шинэ сүүг дөрвөн улирлын турш тасралтгүй бэлтгэдэг. Компанийн Сүү бэлтгэлийн алба 400–450 км тойрогт орших 5 аймгийн 22 сум, Улаанбаатар хотын 4 байршил дахь нийт 34 сүү цуглуулах төвөөр дамжуулан сүүгээ цуглуулдаг. Өглөө бүр 06:00 цагт үйлдвэрийн тусгай зориулалтын сүүний машинууд Улаанбаатараас хөдөлж, 200–400 км радиуст байрлах гэрээт малчид, фермерүүдээс сүү цуглуулна. Сүүний машин бүрд мэргэшсэн лаборант ажиллаж, савтай сүү бүрээс дээж авч газар дээр нь чанар, аюулгүй байдлын анхан шатны шинжилгээ хийдэг. Шаардлага хангасан сүүг хөргөлттэй саванд соруулан үйлдвэрт тээвэрлэж, хүлээн авах хэсэгт дахин нарийвчлан шинжилнэ. Сүүг хүлээн авснаас эцсийн бүтээгдэхүүн болох хүртэл хими, микробиологийн нийт 20 төрлийн шинжилгээ хийгддэг. Улирлын чанартай сүүний хомсдолыг бууруулахын тулд АПУ Дэйри Төв аймгийн 4 суманд 1200 зогсоолтой иж бүрэн ферм бүхий, 40 гаруй фермертэй хамтарсан “Сүүний кластер ферм” төслийг хэрэгжүүлж байна.

АПУ Дэйри ямар чанар, хүнсний аюулгүй байдлын баталгаажуулалттай вэ?

АПУ Дэйри ХХК нь 2025 оны FSSC 22000 6.0 хувилбарын хүнсний аюулгүй байдлын болон ISO 9001:2015 чанарын удирдлагын тогтолцооны гэрчилгээтэй. Үүнээс өмнө 2023 онд сүү, жүүсний бүтээгдэхүүнээрээ FSSC 22000 5.1 хувилбараар баталгаажсан. IFOAM-д суурилсан Монголын органик стандарт MNS CAC/GL 32:2017-ийн дагуу 2023 онд органик руу шилжих, 2024 онд “100% органик Монгол хүнс” гэрчилгээ авсан. Байгаль орчны чиглэлд ч баримтжуулсан ажил бий: АПУ Дэйри ISO 14064 стандартын дагуу хамрах хүрээ 1, 2, 3-ын хүлэмжийн хийн тооллогыг хийлгэж баталгаажуулан, ялгарлыг бууруулах зорилт тавьсан. Мөн хаягдал усыг цэвэршүүлэн дахин ашиглах төсөл хэрэгжүүлж, усыг хэмнэх, дахин ашиглах хувийг нэмэгдүүлж, мал амьтны тавлаг байдлыг тогтвортой хөгжлийн зорилтдоо тусгасан. Гэрчилгээ тус бүрийг он оноор нь энэ хуудасны чанарын баталгааны хэсгээс харж, хамрах хүрээ, огноог нь өөрөө шалгах боломжтой.

АПУ Дэйри ямар брэндүүдтэй вэ?

АПУ Дэйри бүтээгдэхүүнээ өөр өөр хэрэгцээнд зориулсан өөрийн брэндүүдээр үйлдвэрлэдэг. Цэвэр сүү брэндийг АПУ ХК-ийн Сүүний үйлдвэр 2006 онд анх үйлдвэрлэж эхэлсэн бөгөөд удаан хадгалагддаг тетрапак савлагаатайгаар Монгол орон даяар худалдаалагддаг. 2014 онд гарсан Сайн брэнд сүү, тараг, йогурт, зөөхий санал болгодог. 2015 онд гарсан Дээж брэнд уламжлалт сүү, цагаан идээг үйлдвэрийн аргаар хэрэглэгчдэд хүргэдэг. PRO+ брэнд 2022 онд Монголд анх удаа лактозгүй сүү үйлдвэрлэж, Болгар тараг, саффронтой сүү зэрэг шинэлэг бүтээгдэхүүн гаргасан. Монгол брэнд нь уураг, амин дэмээр баяжуулсан уламжлалт сүү, тараг юм. Хонин Нуга бяслагийг 2023 оноос Сэлэнгэ аймгийн Мандал суманд, Mont-Yak брэндийн сарлагийн шар тос, амтат хайлмагийг Архангай аймгийн Чулуут сумын гэр үйлдвэрлэлийн төслөөр үйлдвэрлэдэг. Хүүхдэд зориулсан Baby Shark сүү, жүүс, кофе, амттанд зориулсан Creamy Milk, Фрутта жимсний шүүс, өрөм тогтдог Их Нүүдэл сүү энэ цувралыг бүрдүүлнэ.

• Mont-Yak
• Baby Shark
• Honin Nuga
• Их Нүүдэл
• Монгол
• Цэвэр сүү
• Сайн
• Creamy Milk
• PRO+
• Фрутта
• Дээж